هاولاتیه‌ك: "ژ بلى خانييَت مه‌ بانيَت وان ئاخن و نايلونن، خزمه‌تگوزارى ژى دكيَمن"
ره‌سه‌ن ـ دلوڤان زيَبارى
سه‌نته‌رىَ دهوكىَ گه‌له‌ك خانييَت زيَده‌گاڤى لىَ هاتينه‌ ئاڤاكرن پرانيا وان ل تاخىَ گژه‌به‌را و تاخىَ پيشه‌سازينه‌، خه‌لكىَ ڤان تاخا گه‌له‌ك گازندا دكه‌ن و دبيَژن گه‌له‌ك جاران ب نڤيساريَت فه‌رمى مه‌ داخواز ژ سه‌روكاتييا باژيَرڤانيا دهوكىَ كرينه‌ كو بو مه‌ تاپو بكه‌ن داخوازا مه‌ جىَ به‌ جىَ ناكه‌ن، ژ وان كه‌سه‌كى نه‌ڤيا ناڤىَ خو بيَژيت ژ تاخىَ گژه‌به‌را بو ره‌سه‌ن گوت ژ يارا مه‌ گه‌له‌كا نه‌خوشه‌، به‌لكو ئه‌ڤه‌ چه‌ندين جاره‌ ئه‌م داخوازىَ ژ سه‌روكاتييا باژيَرڤانييىَ دكه‌ين داخوازا مه‌ ل پشت خوڤه‌ دهاڤيَن ژ بلى ڤىَ چه‌ندىَ خه‌لك نه‌شيَن پارچا عه‌ردىَ خو يان ژوره‌كا زيَده‌ ئاڤا بكه‌ن هه‌روه‌سا ئه‌ڤ كه‌سه‌ دبيَژيت: ئه‌ز پيَشمه‌رگه‌هم موچىَ من يىَ كيَمه‌ و نه‌شيَم ژى بچمه‌ دخانيبه‌كىَ ب كريَڤه‌، به‌لىَ ره‌مه‌زانى ژ تاخىَ پيشه‌سازى بو ره‌سه‌ن گوت: ئه‌ز خودانىَ 14 زاروكانمه‌ و نوكه‌ ئه‌ز يىَ ل بن كرييانڤه‌ من پارچه‌كا عه‌ردى يا ل تاخىَ پيشه‌سازى هه‌ى ناهيَلن ئاڤابكه‌م، ئه‌و كه‌سىَ قه‌ستا ڤى تاخى بكه‌ت پىَ نه‌ڤيَت هه‌ژاره‌، ئه‌م داخوازىَ دكه‌ين كو حوكمه‌ت چاره‌كىَ بو مه‌ بينيت، ئه‌ڤ خانييه‌ هاتينه‌ ئاڤاكرن ب زيَده‌گاڤى و بانيَت وان يان ئاخن يان نايلون و خه‌لكه‌كىَ هه‌ژاره‌ خه‌لكىَ ڤان جهان گازندا ژ كيَم خزمه‌تگوزارييا دكه‌ن و دبيَژن دسه‌ر ڤىَ چه‌نديَ را كو خانييَت مه‌ دبىَ سه‌روبه‌رن خزمه‌تگوزارى ژى نين، سه‌روكىَ باژيَرڤانييا دهوكىَ (شيَروان عه‌بدلواحد مه‌لو) بو ره‌سه‌ن گوت: تا سالا 2000 ل دهوكىَ 3750 خانى هاتينه‌ تاپوكرن و پشتى 2003 ژى 4450 هاتينه‌ تاپوكرن ئه‌ويَت نه‌هاتينه‌ تاپوكرن عه‌ردىَ باژيَرڤانييىَ يه‌، به‌لىَ مه‌ هزره‌ك بو وانا كرييه‌ كو ئه‌و خانييَت زيَده‌گاڤى هاتينه‌ ئاڤاكرن ئه‌م شوقان بو ئاڤا بكه‌ين هه‌ر ئيَكى تشته‌كىَ بده‌ينى به‌لىَ ئه‌ڤه‌ وىَ چه‌ندىَ ناگه‌هينيت كو دىَ 100% دىَ شقا بو ئاڤاكه‌ين، چونكى هيَشتا ئه‌ڤه‌ به‌س هزره‌، هه‌روه‌سا سه‌روكىَ باژيَرڤانييا دهوكىَ گوت سه‌روكاتيا باژيَرڤانييا دهوكىَ نه‌خشىَ دهوكىَ دايه‌ كومپانيه‌كا ئه‌لمانى بو ماسته‌رپلانا دهوكىَ كو ئه‌ڤ ساله‌ دىَ خانى و پارچيَت زيَده‌گاڤى هيَنه‌ چاره‌كرن ب هه‌ر ره‌نگه‌كى بيت.